[132] EPISTOLA XXXII.

IUSTUS LIPSIUS

HADRIANO VANDER-BURCHIO.

Centurias tuas •εξαστιχως•, & meum alibi nomen; atque ita ingenium simul tuum amavi & in me affectum. Certe ingenium apparet in tam multiplici inventione & faecunda ac facili conformatione stili; Perge & in aevo jam senescenti vigorem animi ostende. Brevi a nobis aliqua videbis, sed tetrica & philosophica, scis quam non pro deliciis, an vanitate etiam dicam, praesentis aevi. Caeterum miratus alibi sum tuam libertatem, & succurrit illud Tragici,
Fortem facit vicina libertas senem.
Illa malis eripiet, neque pax aut felicior status dabit, ut res istae eunt. Fatum Belgicae est, pareamus, & inter nos, quamdiu sumus, amemus. Vale Vir N. & CL. Lovanii. V. Idus Febr. MDCIIII. Fratrem D. Decanum, itemque D. CANTERUM saluto.